Skólareglur

Skólareglur gilda á skólatíma og í öllu starfi á vegum skólans, þar með talið í skólaferðalögum, í skólabílum, í tómstundaskóla, í mötuneyti, á bekkjarkvöldum, á diskótekum og í Íþróttamiðstöðinni á skólatíma. Skólareglurnar eru til endurskoðunar á þessu skólaári.

Samskipti

Starfsfólk skólans lætur sig varða samskipti nemenda og leggur sig fram um að líðan þeirra innan og utan skólans sé sem best. Brugðist verður við vandamálum eins og félagslegri einangrun og einelti (sbr. eineltisáætlun skólans) eins fljótt og vel og kostur er. Mestu skiptir að í skólanum mæti nemendur hlýju viðmóti ásamt festu og öryggi.

• Allt starfsfólk lætur sig varða velferð nemenda og er þeim góð fyrirmynd.
• Starfsfólk og nemendur virða skólareglur og ríkja skal gagnkvæm virðing í samskiptum.
• Samskipti í skólanum grundvallast af kurteisi, gagnkvæmri virðingu og tillitsemi.
• Við gætum þess að virða rétt annarra í námi, starfi og leik.

Ástundun

Skólinn hvetur starfsfólk og nemendur til að sýna jákvæðni og vinna öll sín störf af alúð (eins vel og þeir geta). Slík vinnubrögð leiða af sér ánægju, góðan starfsanda og góðan árangur. Verum stundvís. Leyfi og veikindi á að tilkynna eins fljótt og unnt er til ritara. Leyfi í einn til tvo daga skal sækja um til umsjónarkennara en lengri leyfi skal sækja um skriflega til skólastjórnenda. Hægt er að nálgast þar til gert eyðublað inni á heimasíðu skólans.

• Mætum vel undirbúin hvern dag, skilum heimavinnu og verum með þau gögn sem nota á hverju sinni.
• Mætingarreglur í eldri deild eru birtar á heimasíðu skólans.

Umgengni

Allir eru hvattir til að ganga vel um skólann sinn, eigur hans, nemenda og starfsfólks. Snyrtilegt og fallegt vinnuumhverfi eykur vellíðan allra.

• Nemendum er ekki heimilt að yfirgefa skólalóðina á skólatíma nema með leyfi umsjónarkennara.
• Við notum ekki línuskauta, reiðhjól, hlaupahjól eða hjólabretti á skólalóð á skólatíma nema að gefnu leyfi.
• Notkun farsíma, leikjatölva eða annars sem veldur truflun í kennslustundum er ekki leyfð. Kennari getur leyft notkun tækja til að hlusta á tónlist, enda noti nemendur þá viðeigandi heyrnartól.
• Við erum ábyrg fyrir því tjóni sem við kunnum að valda öðrum, hvort sem um er að ræða líkamstjón eða tjón á búnaði.

Heilbrigðar og hollar lífsvenjur

Skólinn hvetur nemendur og starfsfólk sitt til að ástunda heilbrigðar og hollar lífsvenjur. Ein af forsendum þess að okkur líði vel og við getum stundað störf okkar af ýtrustu kostgæfni er að við séum í góðu líkamlegu ástandi, séum útsofin og borðum hollan mat.

• Ávaxtastund er í boði í nestistíma að morgni.
• Taki nemendur með sér nesti, skal það vera hollt og næringarríkt. Neysla sælgætis og gosdrykkja er einungis leyfð til hátíðabrigða.
• Notkun tóbaks og annarra vímuefna er stranglega bönnuð.

Um skólasókn í 1. – 10. bekk

Hver nemandi í 1. – 10. bekk byrjar með skólasóknareinkunnina 10 í upphafi hverrar annar.

Fjarvistir og óstundvísi koma til frádráttar upphaflegri einkunn, samkvæmt eftirfarandi reglum:

1. a) Of seint (S): Nemandi sem kemur eftir að kennsla er hafin fær Seint. Ef nemandi kemur eftir að tími er hálfnaður fær hann F (fjarvist). Fyrir S í bekkjarskrá er frádráttur 0,25 stig.
2. b) Fjarvistir (F): Fyrir F í bekkjarskrá er frádráttur 0,5. Ef nemandi er fjarverandi skal umsjónarkennari, með aðstoð ritara, leita skýringa á því og meta síðan fjarvistir hans til frádráttar.
3. c) Nemandi sem sefur yfir sig skal fá eitt S (sein)t þegar hann sefur yfir sig í fyrsta sinn (þó hann missi af fleiri en einum tíma). Í annað sinn fær hann S fyrir alla þá tíma sem hann mætti ekki í. Komi þetta fyrir oftar skal viðkomandi fá F (fjarvist) fyrir þá tíma sem ekki var mætt í.

Umsjónarkennari skal skoða einkunn fyrir skólasókn í umsjónarbekk sínum einu sinni í viku og senda foreldrum stöðuna einu sinni í mánuði.

Viðbrögð við brotum á mætingarreglum:

8,5 Umsjónarkennari ræðir við nemanda og foreldra.

7,0 Umsjónarkennari sendir foreldrum bréf og gerir þeim grein fyrir stöðu mála.

5,5 Skólastjóri sendir foreldrum bréf og gerir þeim grein fyrir stöðu mála og boðar þá á fund skólastjórnenda. Málið tilkynnt nemendaverndarráði sem fjallar um málið og virkjar stoðkerfi skólans.

Fari nemandi niður í 2,0 í skólasóknareinkunn verður málið tilkynnt til barnaverndar.

Um skólaferðalög

Vel skipulögð skólaferðalög og vettvangsferðir eru jákvæður og nauðsynlegur þáttur í skólastarfinu.Í öllum skólaferðalögum og vettvangsferðum gilda skólareglur og eiga nemendur að hlíta þeim. Nemandi sem ekki fer í vettvangsferð eða skólaferðalag skal mæta í skólann til annars skólastarfs. Heimilt er að vísa nemanda úr skólaferðalagi ef hann verður uppvís að því að brjóta reglur skólans. Við slíkar aðstæður skal senda hann heim á kostnað foreldra.

Verum sjálfum okkur til sóma í öllum ferðalögum.