Umhverfisviðurkenningar Borgarbyggðar voru afhentar í Ráðhúsi Borgarbyggðar fimmtudaginn 19. september. Þó nokkuð barst af tilnefningum og augljóst að margir íbúar leggja mikinn metnað í umhirðu og ásýnd lóða sinna og jarða. Sérstaka viðurkenningu umhverfis- og landbúnaðarnefndar hlaut að þessu sinni Sturlaugur Arnar Kristinsson, bílstjóri hjá Íslenska gámafélaginu sem sinnir úrgangsþjónustu í dreifbýli Borgarbyggðar.
Hér að neðan er listi yfir verðlaunahafa ársin 2019 ásamt útdrætti úr umsögn dómnefndar.
- 1. Snyrtilegasta bændabýlið
Norður- Reykir í Hálsasveit, Kolbrún Sveinsdóttir og Bjartmar Hannesson
Greinilegt er að ábúendur á bænum huga að því af miklum metnaði að ganga snyrtilega um, sem er krefjandi verkefni sem þarf að huga að alla daga á býli í rekstri.
- 2. Snyrtilegasta lóð við íbúðarhús
Arnarklettur 19 í Borgarnesi, Sigurður Daníelsson og Bjarney Ingadóttir
Lóðin er afar snyrtileg og fjölbreyttur gróður er í garðinum. Aðkoma að húsinu er öll hin snyrtilegasta og greinilegt að mikil vinna og natni er lögð í umhirðu garðs og lóðar.
- 3. Snyrtilegasta lóð við atvinnuhúsnæði
HP Pípulagnir ehf , Brákarbraut 18-20
Lóðin hefur tekið stakkaskiptum og aðkoman er öll hin snyrtilegasta.
- 4. Sérstök viðurkenning umhverfis- og landbúnaðarnefndar vegna umhverfismála
Sturlaugur Arnar Kristinsson starfsmaður Íslenska Gámafélagsins.
Stulli sinnir starfi sínu af einstakri alúð og á stóran þátt í því að bændum og ábúendum gengur betur að flokka sinn úrgang og koma honum í réttan farveg. Almenn ánægja ríkir með störf Stulla enda leggur hann sig alltaf fram um framúrskarandi þjónustu sem skilar sér í aukinni flokkun og jákvæðum viðhorfum til úrgangsþjónustu.
