Farið verður í 2. áfanga við endurgerð Skallagrímsgarðs í næstu viku samkvæmt samþykktri hönnun sem byggir á upphaflegu skipulagi garðsins og áætlað að ljúka honum fyrir lok maí. Árið 2013 var skipulagsteikningin kláruð og samþykkt í sveitarstjórn Borgarbyggðar. Í framhaldinu var farið í lítilsháttar grisjun á gróðri reyndar líkt og árin þar á undan og hafin gróðursetning á fjölærum skuggþolnum þekjuplöntum um miðbik garðsins sem nú þegar eru farnar að gægjast grænar og hraustlegar upp úr moldinni. Þær eiga væntanlega eftir að gleðja gesti garðsins í sumar.
Í þessum 2. áfanga verksins verður hafist handa við hleðslu setbekks við Skallagrímshaug og stefnt að því að ljúka því verki og frágangi svæðisins við hann fyrir mánaðarmótin maí – júní. Setbekkurinn mun ná í hálfhring utan við hauginn þar sem gott verður fyrir einstaklinga og hópa að tilla sér í skjóli fallegra trjáa og lágvaxnari gróðurs og njóta litaskrúðs og angan blóma í nærliggjandi beðum. Setbekkurinn verður unninn úr samskonar grjóti og hlöðnu veggirnir við innganginn og við sviðið.
Þættir framkvæmdarinnar eru eftirfarandi:
- Bundin verður hlíf utan um stofna Álmsins og Asprarinnar sem koma til með að standa sitthvoru megin við setbekkinn. Einnig verður rótarsvæði þessara trjáa girt af meðan á framkvæmd stendur.
- Birkilimgerði og 1 stk. ösp bak við Skallagrímshaug verða fjarlægð og efnið fært til kurlunar.
- Plöntur innan vinnusvæðisins verða fluttar í burtu til geymslu eða á nýjan varanlegan stað.
- Teknir verða stiklingar af þeim plöntum sem ekki verða fluttar vegna stærðar þeirra. Stiklingarnir verða settir í mold og munu nýtast síðar en móðurplantan verður tekin í burtu.
- Unnin verður mæling á legu og hæð setbekksins og hún merkt.
- Grafinn verður meters breiður skurður sem fylltur verður af möl. Það efni sem kemur úr uppgreftrinum verður geymt sitthvoru megin við vinnusvæðið til að spara fluting á efni og einnig til að geta gripið til þess sé þörf á meðan verið er að hlaða setbekkinn og til notkunar við frágang svæðisins eftir að hleðslu er lokið.
- Grjóti og möl til framkvæmdarinnar komið fyrir.
- Setbekkur hlaðinn auk kants við beð.
- Afgangur af efninu frá uppgreftrinum verður sett bak við setbekkinn.
- Ný mold sett ofan á og gróðrsetningarsvæði mótað.
- Gróðursetning lágvaxinna plantna aftan við setbekkinn.
- Endurplantað í beðin kringum hauginn og til hliðar við hann.
- Frágangi svæðisins lokið fyrir mánaðarmótin maí – júní.
Að verkinu koma Samson B. Harðarson landslagsarkitekt og hönnuður endurgerðar garðsins, Unnsteinn Elíasson hleðslumeistari, Steinunn Pálsdóttir sumarstarfsmaður garðsins sem í ár mun vera við vinnu í garðinum lengra tímabil en undanfarin ár og Björg Gunnarsdóttir umhverfis- og landbúnaðarfulltrúi.
