Nýlega hóf sveitarfélagið Borgarbyggð innleiðingu á stafrænu vinnuafli til að sjálfvirknivæða endurtekin verkefni og auka skilvirkni í þjónustu.
Um er að ræða eins konar stafræna gervigreind sem vinnur verkefni í kerfum sveitarfélagsins. Fyrstu verkefni stafræna vinnuaflsins hjá Borgarbyggð er afstemmning lánadrottna og kröfuvöktun.
Kostir innleiðingar stafræns vinnuafls eru meðal annars:
- Ávinningur kemur strax fram – þetta er í raun nýr starfsmaður sem fær ekki laun og nýtir þau kerfi sem þegar eru til staðar.
- Aukin nákvæmni og hraði – stafræni “starfsmaðurinn“ vinnur mun hraðar og með meiri nákvæmni en hægt er með handavinnu.
- Betri nýting starfsfólks – starfsfólk losnar undan endurteknum verkefnum og getur einbeitt sér að verðmætari og skemmtilegri verkefnum, sem eykur starfsánægju.
- Möguleikar til þróunar – hægt er að byrja smátt og bæta síðan fleiri verkefnum við.
Lausnin krefst hvorki dýrrar þróunar né flókins innleiðingarferlis, svo framarlega sem ferlar eru vel skilgreindir og öryggismál í lagi.
Fyrstu verkefnin sem stafræna vinnuaflið hefur innt af hendi fyrir Borgarbyggð lofa góðu en fleiri verkefni eru nú í skoðun og verða væntanlega falin stafræna vinnuaflinu á næstu misserum, m.a. ferli tengd þjónustu við íbúa, afgreiðslu umsókna og fjármála- og mannauðsferlum.
Borgarbyggð býður nýjan starfskraft velkominn til starfa en umræddur hefur ekki fengið nafn, Borgarbyggð mun efna til hugmyndasamkeppni fyrir stafræna vinnuaflið í samstarfi við grunn- og framhaldsskóla í sveitarfélaginu.
