Af vef Skessuhorns.
Þorsteinn Eyþórsson, 62 ára Borgnesingur, leggur af stað hjólandi hringveginn í dag, miðvikudaginn 8. júní. „Ég ætla ekki að vera með neinn æsing og stefni á að taka 16 daga í þetta,“ segir Steini þegar Skessuhorn hafði samband við hann. „Það eru svona að meðaltali um 85 kílómetrar á dag,“ bætir hann við. Steini byrjaði að hjóla fyrir tveimur árum og hjólaði Snæfellsnesshringinn síðasta sumar. Eftir það hefur hann verið staðráðinn í að hjóla hringveginn. Hann segir þessa ferð fyrst og fremst vera áskorun á sjálfan sig en einnig ætlar hann að láta gott af sér leiða og safna peningum fyrir ADHD samtökin. „Þetta málefni stendur mér nærri en ég á nokkur barnabörn sem eru greind með ADHD,“ segir Steini.
Hægt er að fylgjast með ferðinni á Facebook en þar hefur Steini opnað síðuna: „Athygli já takk hjólað hringinn.“ Reikningsnúmer fyrir söfnunina er: 354-13-200093 og Kennitala: 100354-7569.
