Borgarbyggð, Akraneskaupstaður og Borgarfjarðarsveit hafa gert
með sér samkomulag um að efla samvinnu og samstarf þessara sveitarfélaga á komandi ári. Samkomulagið sem undirritað var föstudaginn 12. desember nær til ýmissa verkefna og má þar nefna samstarf um uppbyggingu samgangna, eflingu framhaldsskóla og háskóla á svæðinu, auka samstarf safna og þrýsta á um gerð menningarsamnings fyrir Vesturland og vinna að stækkun og eflingu sveitarfélaga svo fátt eitt sé talið.
 |
| Samkomulagið undirritað |
Hér að neðan er fréttatilkynning um samkomulagið.
Akraneskaupstaður, Borgarbyggð og Borgarfjarðarsveit hafa þann 12. desember 2003 gert með sér samkomulag um að auka eins og kostur er samstarf og samvinnu. Í því samkomulagi er meðal annars kveðið á um eftirfarandi atriði:
- Sveitarfélögin eru sammála um að gera sameiginlega tillögu til samgönguráðuneytisins um uppbyggingu safnvega á svæðinu, að brýnt sé að brúa Grunnafjörð og að beita sér fyrir lagningu Sundabrautar. Þá eru sveitarfélögin sammála um að auka enn frekar jákvæð áhrif Hvalfjarðarganga og að knýja á um að ríkið stuðli með beinum hætti að því að gjaldtaka af umferð um göngin verði lækkuð.
- Sveitarfélögin eru sammála um að vinna eigi að stækkun og eflingu sveitarfélaga í Borgarfjarðarhéraði.
- Samkomulag er um að vinna að því að efla starfsemi Landbúnaðarháskólans á Hvanneyri, Viðskiptaháskólans að Bifröst og Fjölbrautaskóla Vesturlands.
- Aðilar eru sammála um að auka samstarf safna, þrýsta á um gerð menningarsamnings sveitarfélaganna á Vesturlandi við ríkið auk þess sem þau eru sammála að standa vörð um uppbyggingu menningarstarfsemi í Reykholti og uppbyggingu Snorrastofu.
- Þá er samkomulag um að vinna áfram sameiginlega að vímuvarnarmálum, skoða hvort hagkvæmt sé að reka sameiginlega tækniþjónustu og þjónustu á sviði félagsmála, kanna hvort sameiginleg útboð geti verið hagkvæmur kostur í einstökum tilvikum, kanna frekara samstarf varðandi úbætur í holræsamálum, og auka samstarf á sviði skólamála. Þá er ætlunin að kanna frekara samstarf varðandi endurmenntun starfsmanna, vinna áfram að samstarfi á sviði íþrótta- og æskulýðsmála, standa saman að uppbyggingu á Grundartangasvæðinu í samvinnu við aðra sameignaraðila að Grundartangahöfn og stuðla að frekari þátttöku Orkuveitu Reykjavíkur í verkefnum í héraðinu.
- Sveitarfélögin eru þá sammála um að bjóða íbúum sveitarfélaganna upp á þjónustu á sviði dagvistarmála, heimilishjálpar, vinnu Vinnuskóla og þjónustu tónlistarskóla án tillits til þess í hvaða sveitarfélagi viðkomandi aðilar eiga lögheimili.
Allt er þetta gert til þess að bæta búsetuskilyrði í sveitarfélögunum og efla sveitarfélögin og gera þau betur í stakk búin til að sinna verkefnum sínum. Starfsmenn sveitarfélaganna munu annast framkvæmd einstakra verkefna en þær sveitastjórnir sem standa að samkomulaginu munu hittast einu sinni á ári og fara yfir sameiginleg hagsmunamál og skoða jafnframt frekari möguleika á auknu samstarfi.
Þá hefur Akraneskaupstaður undirritað samkomulag við Snorrastofu og Byggðsafnið að Görðum um að styðja rekstur Snorrastofu með fjárframlagi næstu þrjú ár. Snorrastofa og Byggðasafnið að Görðum munu á þeim tíma leita leiða til að auka samstarf sitt.
Gísli Gíslason, Páll BrynjarssonLinda Björk Pálsdóttir
bæjarstjóri bæjarstjóriskrifstofustjóri
AkranesiBorgarbyggð Borgarfjarðarsveit
