Samþykkt hefur verið nýtt deiliskipulag til auglýsingar fyrir Íþróttasvæðið í Borgarnesi. Byggðarráð afgreiddi tillöguna á fundi sínum síðast liðinn fimmtudag. Þá var samþykkt hefjast handa við forval fyrir útboð á byggingu á knatthúsi – fjölnota íþróttahúsi á svæðinu. Þann 19. júní var haldið opið hús fyrir íbúa þar sem bæði nýtt deiliskipulag og bygging hússins voru kynnt. Þar voru á staðnum verkfræðingar frá EFLU, sem unnið hafa að frumhönnun hússins, og land- og skipulagsfræðingur Landmótunar, sem sá um vinnu við skipulagið, og svöruðu spurningum íbúa.
Næstu skref
Á opna húsinu var farið yfir drög að tímalínu fyrir skipulagið. Brátt mun auglýsing vegna skipulagsins birtast í Skipulagsgátt, Lögbirtingarblaðinu og fjölmiðlum. Lögbundinn auglýsingatími er sex vikur og á þeim tíma gefast íbúum og öðrum hagsmunaaðilum kostur á að skila inn athugasemdum.
Að loknum auglýsingatíma fjallar skipulags- og byggingarnefnd um framkomnar athugasemdir og gerir tillögu til sveitarstjórnar. Þá er þeim svarað er gerðu athugasemdir við tillöguna. Gera má ráð fyrir að þetta tímabil taki um tvær vikur.
Í kjölfarið tekur Skipulagsstofnun tillöguna til umfjöllunar en hún gefur sér þrjár vikur til að koma athugasemdum á framfæri.
Ef Skipulagsstofnun gerir athugasemdir þá bregst sveitarstjórn við með því að gera nauðsynlegar breytingar og senda bréf til Skipulagsstofnunar. Loks birtir sveitarstjórn auglýsingu í b-deild stjórnartíðinda. M.v. ofangreinda tímalínu má því ætla að skipulag gæti orðið tilbúið undir lok október gangi ferlið hnökralítið fyrir sig.
Undirbúningur, hönnun og upphaf framkvæmda
Undirbúningur vegna byggingar knatthúss helst í hendur við nýtt deiliskipulag. Búið er að auglýsa forval vegna byggingar íþróttahússins og er miðað við alútboð á verkinu sem felst í því að bjóðendur bjóða bæði í fullnaðarhönnun og framkvæmdina sjálfa. Útboðið sjálft mun síðan fara fram að lokinni samþykkt deiliskipulags.
Ef allt gengur eins og í sögu gætu undirbúningsframkvæmdir og hönnun hafist í fyrir lok árs og framkvæmdir við húsið sjálft í raun hafist að útboði loknu.
Frekari vinna vegna áhrifa framkvæmdanna á Borgarbyggð stendur yfir en t.a.m. er nú unnið óháð mat á áhrifum þeirra á fjárhag sveitarfélagsins í samræmi við sveitarstjórnarlög. Í ljós umfangs verksins þá ákvað Borgarbyggð snemma í sumar að láta vinna vinnslutillögu og var hún til kynningar um umsagnar í Skipulagsgátt.
Sjá nánari upplýsinar hér.
