Dagur leikskólans verður haldinn hátíðlegur í leikskólum landsins þriðjudaginn 6. febrúar. Þetta er í ellefta skipti sem haldið er upp á daginn en 6. febrúar er merkilegur dagur í leikskólasögu þjóðarinnar því á þessum degi árið 1950 stofnuðu frumkvöðlar leikskólakennara fyrstu samtök sín.
Tilgangur Dags leikskólans er að vekja athygli á hlutverki leikskóla og starfi leikskólakennara.
Samstarfsaðilar um Dag leikskólans eru Félag leikskólakennara, Félag stjórnenda leikskóla, Samband íslenskra sveitarfélaga, mennta- og menningarmálaráðuneytið og Heimili og skóli – landssamtök foreldra. Allir sem koma að málefnum leikskólans á einn eða annan hátt, eru hvattir til að halda Degi leikskólans á lofti og fylgjast vel með starfsemi leikskólanna þennan dag. Leikskólakennarar eru sérstaklega hvattir til að vekja athygli á störfum sínum.
Í Borgarbyggð eru fimm leikskólar starfandi, Andabær á Hvanneyri, Hnoðraból á Grímsstöðum, Hraunborg á Bifröst og Klettaborg og Ugluklettur í Borgarnesi. Þar er unnið fjölbreytt starf undir stjórn áhugasamra leikskólakennara og annars starfsfólks í samstarfi við börnin sem þar dvelja.
Við óskum leikskólum til hamingju með daginn!
