Könnun á aðgengi unglinga að tóbaki

Miðvikudaginn 27. júlí 2011 fór fram könnun á vegum forvarnarhóps Borgarbyggðar á aðgengi unglinga að tóbaki í nokkrum verslunum og veitingastöðum í sveitarfélaginu. Könnunin var framkvæmd af Sigurþóri Kristjánssyni forstöðumanni félagsmiðstöðvarinnar Óðals, með aðstoð tveggja unglingsstúlkna frá Akranesi.

Af þeim tíu stöðum sem farið var á og selja tóbak var farið að lögum um sölu á tóbaki á sex stöðum og stúlkunum ekki selt tóbak. Á fjórum stöðum var ekki farið að lögum og stúlkurnar fengu afgreitt tóbak.

Sent hefur verið bréf til rekstraraðila um útkomu fyrirtækja þeirra og í þeim tilfellum sem við á eru þeir hvattir til að bæta vinnureglur varðandi sölu á tóbaki svo þær standist lög um tóbaksvarnir.

Samskonar könnun hefur verið gerð undanfarin ár og svo virðist sem það hafi jákvæð áhrif og veki rekstraraðila til umhugsunar.