Viðhald á götum og gangstéttum og nýframkvæmdir

Frá framkvæmdum við Ugluklett í Borgarnesi

Vegfarendur í Borgarnesi hafa vart komist hjá því að verða varir við þó nokkrar viðhaldsframkvæmdir á götum og gangstéttum. Nýverður hefur verið lagt malbik á Berugötu (sjávarmegin) og kafla við Hrafnaklett og Arnarklett. Fyrir liggur að endurnýja hluta af steyptum gangstéttum við Kjartansgötu, Berugötu og Borgarbraut. Jafnframt þessu verður hluti af gangstéttum við Túngötu á Hvanneyri endurnýjaðar.

 

Búið er að semja við Borgarverk, að undangengnu útboði, um gatnagerð við Bjargsland II og Selás í Borgarnesi og gatnagerð á Varmalandi.

Auglýst hefur verið eftir tilboðum í gatnagerð við Skólaflatarhverfi á Hvanneyri.

Frestað hefur verið að klára yfirborðsfrágang við Arnarklett í Borgarnesi og á eyju milli þjóðvegar og Digranesgötu. Í báðum tilvikum er um að ræða beiðni frá Orkuveitu Reykjavíkur vegna fyrirhugaðra framkvæmda við útrásir í Borgarnesi.

Lokið er framkvæmdum við gatnagerð við Ugluklett og gamla miðbænum í Borgarnesi. Ekki hefur verið hægt að malbika hluta Skúlagötu vegna viðgerða á “gamla mjólkursamlaginu”.

Lokið er við að leggja gangstétt við plan á Þorsteinsgötu. Því verki er því lokið utan yfirborðsmerkinga.

Þá má nefna að verið er að byrja á framkvæmdum við gervigrasvelli á Hvanneyri og Bifröst.