Á laugardag fór fram smölun ágangsfjár á vegum Borgarbyggðar í landi Skarðshamra í Norðurárdal. Smölun á vegum sveitarfélagsins er grundvelli samþykktar byggðarráðs frá 22. júní s.l. en landeigendur Skarðshamra höfðu ítrekað farið fram á að sveitarfélagið smalaði ágangsfé af landinu. Í einu fjallskilaumdæmi Borgarbyggðar, þ.e. Þverárþings, hefur verið virkjuð sú grein fjallskilasamþykktar sem gerir bændum skylt að reka fé á afrétt eða halda búfénaði í heimalandi í fjárheldri girðingu. Var greinin virkjuð að frumkvæði stjórnar fjallskilaumdæmisins og samþykkt af sveitarstjórn. Aðeins er hins vegar smalað sé það sannanlega mat sveitarfélagsins að skilyrði um ágang sé uppfylltur og að umrætt svæði falli undir fjallskilaumdæmis Þverarþings. Áður en til smölunar kemur eru ætlaðir fjáreigendur upplýstir og þeim gefinn kostur á að smala og sækja fé sitt.
Alls söfnuðust 63 kindur, lambfé og hrútar við smölunina. Gott samstarf var haft við Matvælastofnun og á vegum MAST voru á staðnum eftirlitsdýralæknir og dýraeftirlitsmaður sem mátu ástand fjárins. Ætlunin hafði verið að allt féð yrði flutt á afrétt en að lokinni ástandsskoðun var það allt flutt til þess bæjar sem það var talið upprunið. Hluti fjárins var reyndar ómerktur en allt fé sem bar mark kom frá einum og sama bænum.
Samkvæmt lögum bera eigendur ætíð ábyrgð á sínum dýrum. Ekki er heimilt að flytja á afrétt fé sem er ómerkt, órúið eða ber merki vanhirðu.
