Tilkynning frá Poppoli:
Næstkomandi föstudag, 28. október, stendur Poppoli kvikmyndafélag fyrir bíókvöldi í Dalabúð. Sýningin fer fram í þakklætisskyni fyrir ómetanlega aðstoð Dalamanna við gerð kvikmynda á undanförnum þremur árum. Á þessum tíma var gerð heimildamyndin Land míns föður sem fjallar um íslenskt sveitasamfélag með áherslu á líf og störf þriggja bænda í Dölunum. Nú er samsagt komið að sérstakri sýningu á Landi míns föður og viljum við bjóða öllum sem áhuga hafa á að sjá myndina. Land míns föður er sýnd kl. 20:00, föstudaginn 28. október, í Dalabúð í Búðardal. Ókeypis aðgangur meðan húsrúm leyfir.
Myndin var frumsýnd á heimildahátíðinni Skjaldborg á Patreksfirði fyrr á árinu og var einnig sýnd á RIFF kvikmyndahátíðinni. Við erum ósköp stolt af myndinni og hefur hún allsstaðar hlotið góðar viðtökur. Þar ber ekki síst að þakka gestrisni Dalamanna sem hafa hleypt okkur inn í líf sitt. Án þeirra hefði “Land míns föður” ekki orðið til. Sama kvöld verður nýjasta mynd Ólafs Jóhannessonar, Borgríki sýnd. Borgríki er glæný og sjóðheit spennumynd sem frumsýnd var fyrr í mánuðinum. Borgríki skartar úrvali landsþekktra leikara á borð við Ingvar E. Sigurðsson, Ágústu Evu Erlendsdóttur, Sigurð Sigurjónsson, og nýstirnið Zlatko Krickic sem búsettur hefur verið hér á landi í hartnær tvo áratugi. Borgríki hefur slegið í gegn í kvikmyndahúsum landsins og fengið frábæra dóma.
Sýning á Borgríki hefst kl. 22:00, föstudaginn 28. október. Aðeins er um þessa einu sýningu að ræða! Til að standa straum af kostnaði við undirbúning og framkvæmd bíókvölds í Dalabúð verður miðaverð á Borgríki 1.000 kr.
Frekari upplýsingar um myndirnar tvær má finna á heimasíðu Poppoli kvikmyndafélags; www.poppoli.is
Við hvetjum alla sem vettlingi geta valdið að mæta í Dalabúð á föstudaginn. Allir velkomnir!
Semsagt,
Bíókvöld í Dalabúð, föstudaginn, 28. október.
Heimildamyndin “Land míns föður”
Húsið opnar kl 19:30
sýning hefst kl. 20:00
ókeypis aðgangur meðan húsrúm leyfir
Spennumyndin “Borgríki”
sýning hefst 22:00
miðaverð 1.000.
Sjáumst hress og kát í Dalabúð!
Poppoli kvikmyndafélag.
