Í anddyri við bókasafnið í Safnahúsi Borgarfjarðar er nú stillt upp litlu handsmíðu jólatré fyrir sautján kerti. Um er að ræða merkan safngrip úr eigu byggðasafns Borgarfjarðar en tréð var á sínum tíma smíðað af Guðmundi Böðvarssyni skáldi á Kirkjubóli (1904-1974) í Hvítársíðu og var notað þar á bæ í áratugi. Tréð er málað grænt en fótur þess hvítur og rauður. Það var upprunalega skreytt með pappírsræmum. Böðvar sonur Guðmundar man eftir trénu og og er lítil saga því tengd á sýningarspjaldi við hlið trésins. Þar er einnig stillt upp sextán gömlum jóla- og nýárskortum og sagt frá þeim á sýningarspjaldi. Þau eru mikið augnayndi og eru úr eigu héraðsskjalasafnsins. Báðar þessar örsýningar munu standa fram á þrettándann.
