Endurreikningi afsláttar á fasteignaskatti lokið

Samkvæmt reglum Borgarbyggðar eiga tekjulágir elli- og örorkulífeyrisþegar sem eiga lögheimili í Borgarbyggð rétt á afslætti af fasteignaskatti. Afslátturinn nær til íbúðarhúsnæðis sem viðkomandi býr sjálfur í.

Afslátturinn ræðst af öllum skattskyldum tekjum undanfarins árs, þ.m.t. eigna- og fjármagnstekjum. Hann er reiknaður til bráðabirgða við álagningu fasteignagjaldanna samkvæmt síðasta skattframtali. Þegar afslátturinn var reiknaður í upphafi árs 2009 lá fyrir skattframtal með tekjum ársins 2007 og var afslátturinn reiknaður út frá þeim.

Nú liggur fyrir staðfest skattframtal sem sýnir tekjur ársins 2008 og hefur afslátturinn verið endurreiknaður og leiðréttur miðað við þær. Í ljós kemur að í sumum tilfellum hefur afslátturinn verið ofreiknaður og þurfa gjaldendur þá að greiða til baka en í öðrum tilfellum hefur afslátturinn verið vanreiknaður og verður þá gjaldendum endurgreiddur mismunurinn. Í flestum tilfellum er afslátturinn óbreyttur frá því sem var við bráðabirgðaútreikning í upphafi árs. Þeim elli- og örorkulífeyrisþegum sem fá breytingu á afslættinum verður sent bréf varðandi niðurstöðu endurreikningsins ásamt greiðsluseðli þar sem það á við.