Bæjarstjórn Borgarbyggðar samþykkti á fundi sínum 20. júní 2002 að ráða Pál S. Brynjarsson sem bæjarstjóra Borgarbyggðar kjörtímabilið 2002 – 2006.Páll er að ljúka tveggja ára framhaldsnámi í stefnumótun og stjórnsýslu frá háskólanum í Volda í Noregi. Árin 1991 – 1995 stundaði hann nám í stjórnmálafræði við Árhúsaháskóla í Danmörku og lauk því námi með meistaragráðu. 1991 útskrifaðist Páll með BA í stjórnmálafræði frá Háskóla Íslands.
1985-1986 stundaði Páll nám á íþróttabraut við Skjeberg Folkehogskole. 1985 lauk Páll stúdentsprófi af félagsfærðibraut við Menntaskólann á Akureyri.
Árin 1997 – 2000 var Páll framkvæmdastjóri Vestnorræna ráðsins sem er samstarfsvettvangur þjóðþinga Íslands, Færeyja og Grænlands. Árin 1996 – 1997 starfaði Páll sem flokkshópsritari þingflokks hægrimanna í Norðurlandaráði og á sama tíma var hann framkvæmdastjóri afmælisnefndar Sauðárkróks. Árið 1995 starfaði Páll við svæðisskipulag Skagafjarðar. Páll hefur setið í nefndum á vegum menntamálaráðherra og í vinnuhópi sem mótaði tillögur um skipan nefndakerfis og stjórnsýslu í sameinuðu sveitarfélagi í Skagafirði auk ýmissa sumarstarfa meðfram námi s.s. knattspyrnuþjálfun.
Sambýliskona Páls er Inga Dóra Halldórsdóttir félagsfræðingur og eiga þau tvö börn, Ástdísi, 9 ára og Brynjar Snæ 7 mánaða.
Páll og fjölskylda hans eru nú að flytja búferlum frá Noregi og kemur Páll til starfa hjá Borgarbyggð þann 10. júlí n.k.
