Á fundi bæjarstjórnar Borgarbyggðar 18. janúar s.l. var samþykkt skólastefna Borgarbyggðar.
Í skólastefnunni koma fram áherslur Borgarbyggðar í skólamálum varðandi grunnskóla, leikskóla og tónlistarskóla.
Skólastefnan er svohljóðandi:
SKÓLASTEFNA
Skólastefna Borgarbyggðar nær til leikskóla, grunnskóla og tónlistarskóla sveitarfélagsins. Lög, reglugerðir og aðalnámsskrár eru grundvöllur stefnu um skólastarf ásamt ákvörðunum bæjarstjórnar. Hver skólastofnun getur markað eigin skólastefnu í samræmi við stefnu sveitarfélagsins og hefur að öðru leyti frjálsar hendur um skipulag og framkvæmd skólastarfs.
Með stefnumörkun sinni leggur Borgarbyggð áherslu á eftirfarandi:
* skólar sveitarfélagsins verði í fararbroddi hvað varðar gæði náms og starfsaðstöðu
* öllum börnum í sveitarfélaginu sé tryggður jafn aðgangur að góðri og fjölbreyttri aðstöðu og menntun í öruggu starfsumhverfi
* grunnskólar verði einsetnir heilsdagsskólar og nemendur eigi þar kost á máltíð
* hlutverk sveitarfélagsins er að styðja við umbóta og þróunarstarf í skólunum
* faglegur metnaður ríki í skólastarfi og þeirri þjónustu sem sveitarfélagið veitir skólunum
* starfsfólki verði tryggður aðgangur að símenntun og endurmenntun er bjóðast á hverjum tíma
* í skólum sveitarfélagsins verði aukin áhersla á upplýsingatækni við sem fjölbreyttastar aðstæður
* gott samstarf ríki milli starfsfólks, stjórnenda, nemenda og foreldra, innan skólastofnana, milli skólastiga og meðal einstakra stofnana.
* árangur og vellíðan barna í skólastarfi er grunnur að velferð þeirra um ókomna tíð og er jafnframt vitnisburður um frammistöðu okkar allra.
