Gætum varúðar um jól og áramót

Ágætu íbúar Borgarbyggðar

Í ljósi þess að senn gengur í garð sá árstími þegar mikli hætta er á eldsvoðum af völdum kertaljósa og jólaskreytinga vill undirritaður fá að fanga athygli ykkar sem línur þessar lesa á nokkrum grundvallaratriðum.

Heilræði sem halda ber í heiðri:

*Reykskynjarar eru sjálfsögð og ódýr líftrygging, skipta skal um reykskynjara á tíu ára fresti og rafhlöður í þeim til dæmis í desember ár hvert eða oftar ef þörf er á.

*Átt þú handslökkvitæki? Er það í lagi? Hvenær var það síðast yfirfarið?

*Ofhlöðum ekki fjöltengi og gætum að gömlum og lélegum rafbúnaði.

*Notum ávalt viðurkenndar rafvörur og fjöltengi með slökkvara og gaumljósi.

*Eldvarnateppi skal vera í hverju eldhúsi og á aðgengilegum og sýnilegum stað.

*Gerum flóttaáætlun út úr íbúinni vegna eldsvoða með öllum á heimilinu ef til hættuástands kynni að koma og æfum hana reglulega.

*Höfum ekki færri en tvær greiðar flóttaleiðir úr hverri íbúð!

*Gætum varúðar í umgengni við kertaljós og skreytingar, skiljum börn aldrei eftir eftirlitslaus nærri logandi kertum eða eldi.

*Aðgætum íbúðir okkar áður en gengið er til hvílu, eða þær eru yfirgefnar að degi til og hvort nokkurstaðar logi á kerti eða skreytingum.

*Logandi kertaljós séu aldrei höfð í gluggum vegna dragsúgs og lausra gardína!!

*Dreifið sem mest raforkunotkun við matseld um jól og áramót það kemur í veg fyrir hugsanleg óþægindi vegna mikils álags á dreifikerfi rafmagns.

*Ullar eða leðurvettlingar og öryggisgleraugu við meðferð flugelda um áramót!!

*Munum 112 neyðarlína ef slys, veikindi eða eldsvoða ber að höndum!!

Með jólakveðju,